വന്ദ്യ കെ. റ്റി. ഫിലിപ്പ് അച്ചനെ കുറിച്ച് ഒരു പുസ്തകം ഇറങ്ങുന്നതിലുള്ള എന്‍റെ അതിയായ സന്തോഷം ആദ്യമേ തന്നെ അറിയിക്കട്ടെ. അച്ചനുമായി ദീര്‍ഘകാലത്തെ പരിചയമുണ്ട്. അച്ചന്‍ ശെമ്മാശ്ശനായിരിക്കുമ്പോള്‍ മുതല്‍ അടുത്ത് അറിയുവാന്‍ കഴിഞ്ഞിട്ടുണ്ട്. പുതുപ്പാടി സെന്‍റ് പോള്‍സ് ആശ്രമത്തിലും, യാച്ചാരത്തെ സെന്‍റ് ഗ്രീഗോറിയോസ് ബാലഭവനത്തിലും അച്ചന്‍ ശുശ്രൂഷ ചെയ്യുകയുണ്ടായി. കൂടാതെ പാലാരിവട്ടം ദേവാലയത്തില്‍ ശുശ്രൂഷിക്കുന്ന അവസരത്തില്‍ ആ ദേവാലയത്തില്‍ പോകുവാനും അച്ചനോടൊപ്പം സമയം ചിലവഴിക്കുവാനും ഭാഗ്യം ലഭിച്ചിട്ടുണ്ട്. ഒരുപിടി നല്ല ഓര്‍മ്മകള്‍ അച്ചന്‍ സമ്മാനിച്ചിട്ടുണ്ട് എന്ന് യാതൊരു അതിശയോക്തിയും ഇല്ലാതെ പറയുവാന്‍ കഴിയും. പുതുപ്പാടിയിലും യാച്ചാരത്തും അച്ചന്‍ ഒരു നല്ല സാക്ഷ്യം ആയിരുന്നു എന്ന് ഓര്‍ക്കുന്നു. കുട്ടികളുടെ ഇടയില്‍ നല്ല സ്നേഹിതനായും ഉത്തമ മാതൃകയായും അച്ചന്‍ പ്രവര്‍ത്തിച്ചു എന്ന് നന്ദിയോടെ ഓര്‍ക്കുന്നു.
കൂടാതെ അച്ചന്‍റെ മകന്‍ മീഖയുടെ പഠനശേഷം അഞ്ചു വര്‍ഷത്തോളം യാച്ചാരത്ത് പ്രവര്‍ത്തിക്കുന്നതിനായി അച്ചന്‍ പ്രേരിപ്പിക്കുകയും അവന്‍ അത് ഏറെ സന്തോഷത്തോടെ നിറവേറ്റുകയും ചെയ്തു. സഭയുടെ ഒരു മിഷന്‍ സ്ഥാപനത്തിലേക്ക് സ്വന്തം മകനെ കുറച്ചുനാള്‍ സന്നദ്ധപ്രവര്‍ത്തനത്തില്‍ പങ്കാളിയാകുവാന്‍ ഉത്സാഹിപ്പിച്ചത് സഭയോടും മിഷന്‍ പ്രവര്‍ത്തനങ്ങളോടും ഉള്ള അച്ചന്‍റെ താല്‍പര്യത്തെ വെളിവാക്കുന്നു. അച്ചനെപ്പറ്റി നല്ല വാക്കുകള്‍ എല്ലാവരില്‍ നിന്നും നേരിട്ട് കേള്‍ക്കുവാന്‍ സാധിച്ചിട്ടുണ്ട്. അച്ചന്‍ എല്ലാ വൈദികര്‍ക്കും ഒരു നല്ല മാതൃകയായിരുന്നു എന്നതില്‍ സംശയമില്ല. തന്നെ ഏല്പിച്ച ശുശ്രൂഷകള്‍ ഏറ്റവും ഉത്തരവാദിത്തത്തോടെ പ്രസന്ന മുഖത്തോടെ അച്ചന്‍ നിര്‍വഹിച്ചിട്ടുണ്ട്. അച്ചന്‍ മലങ്കരസഭയ്ക്ക് അഭിമാനകരമായി പ്രവര്‍ത്തിച്ച ഒരു വൈദികനായിരുന്നു എന്ന് എനിക്ക് ഉത്തമബോധ്യം ഉണ്ട്. അച്ചന്‍റെ പ്രാര്‍ത്ഥന ബലഹീനനായ എനിക്കും സഹായകരമാകട്ടെ എന്ന് കര്‍ത്താവില്‍ പ്രത്യാശിക്കുന്നു.
No comments:
Post a Comment